قوم ایک غمخوار ‘مدبر اور صاحب علم شخصیت سے محروم ہوگئی

مولانا عبدالحق بلوچ دوران علالت بی این ایم کے جھدکاران کے ساتھ

کوئٹہ ( پ ر ) بلوچ نیشنل موومنٹ کے قائمقام صدر عصا ظفر نے بلوچ عالم دین مولانا عبدالحق بلوچ کی وفات پر گہرے رنج وغم کا اظہار کرتے ہوئے کہا ہے کہ مولانا عبدالحق بلوچ ایک قوم دوست عالم دین تھے ان کی وفات سے قوم ایک غمخوار 'مدبر اور صاحب علم شخصیت سے محروم ہوگئی ہے ۔دریں اثناءبی این ایم کے مرکزی دفتر اطلاعات سے جاری کردہ بیان میں کہا گیاہے کہ مولانا عبدالحق بلوچ اپنی سیاسی وابستگی سے بلند سوچ کے مالک اور موجودہ قومی تحریک کے پرجوش حامی تھے ۔اُن کے بی این ایم سمیت تمام قوم دوست جماعتوں کے ساتھ قریبی تعلقات رہے ہیں ۔مولانا کا فتویٰ تاریخ کا حصہ بن چکاہے جس میں انہوں نے ببانگ دہل جنگ آزادی میں کام آنے والے سر مچار وں کو اسلامی نکتہ نظر سے بھی شہیدقرار دیا تھا ۔مولانا طویل عرصے سے اپنی علالت کے باعث سیاسی طور پر متحرک کردار ادانہ کرسکنے کے باوجود بلوچ قوم دوست سیاست پر گہری نظر ر کھتے تھے اور اصلاح احوال کے لیے وقتا ًپہ وقتاًاپنا کردار اداکرتے رہتے تھے ۔ان کی شخصیت اور کردار بلوچ علما ءکے لیے ایک مثال ہے ۔ان کی وفات سے بلوچ قوم ایک ایسی ہستی سے محروم ہوگئی ہے جواسلامی اصولوں پر کاربند رہنے کے باوجود بلوچ رسم ورواج کا پیکر تھے ۔